MARIK
Ach, wenn wi nu kein Hüsung kriegen!
Jehann, kein Hüsung – keine Tru;
uns gifft kein Preister nich tausåmen,
wenn ein uns nich in Hüsung nåhmen.

JEHANN
Ih, wenn wi narens unnerkåmen,
denn treck’ wi in de Stadt herin.

MARIK
Dat sall man ok nich mœglich sien.

JEHANN
jå, Jochen is doch ’rinner treckt.

MARIK
Jehann, von Jochen will’n wi schwiegen,
mit denn wür dunn de Schann taudeckt,
dat wür taugliek em uperlecht,
denn Råtsherrn sien olt Diern tau friegen.
Ach Gott, ik räd! – ik heff kein Recht,
dat Mäten noch ein Blåm tau måken.

JEHANN
Ach, schwiech doch still von so ’ne Såken.
Heww’n up denn Harfst wi noch kein Dack,
denn treck’ wi fuurt mit Sack un Pack,
denn treck’ wi de Kramersdörper nå,
denn gåhn wi nå Amerika.