Denn kickst Du mi so tru nich an,
As Du dat sünst woll ded’st, Jehann;
Un de in Leiw so tau Di wir,
De scheidt villicht von Gottes Ird’
In Fluch un Haß.

ERZÄHLER
Sei let em los un stödd em furt,
As wir dit all ehr letztes Wurd.
Hei löppt ehr nah.

JEHANN
Süll so dat kamen,
Denn halt s’ de Deuwel alltausamen.
Denn halt de Deuwel all de Herrn!
Ick let mi schin’n, mit Fäuten pedd’n,
Ick bün ’t jo anners nich gewennt,
Doch wenn ’t mit Di so mal eins ennt,
Denn sall en Dunner ’rinner slahn,
Dat ehr de Ogen äwergahn!

MARIK
Oh, Gott, Jehann, wat heww ick seggt?
Wat heww ick seggt, wat heww ick dahn?
Oh, wes doch still, lat sin, Jehann!

ERZÄHLER
Hei makt sei los un schüwwt sei weg,
Un fött ehr Hän’n in sin tausam;