MARIK
Ach, wenn wi nu kein Hüsung krigen!
Jehann, kein Hüsung – keine Tru;
Uns giwwt kein Preister nich tausamen,
Wenn ein uns nich in Hüsung namen.

JEHANN
Ih, wenn wi nahrens unnerkamen,
Denn treck wi in de Stadt herin.

MARIK
Dat sall man ok nich mäglich sin.

JEHANN
Je, Jochen is doch rinner treckt.

MARIK
Jehann, von Jochen will wi swigen,
Mit den würd dunn de Schan’n taudeckt,
Dat würd tauglik em uperleggt,
Den Ratsherrn sin oll Dirn tau frigen.
Ach Gott, ick red! – Ick heww kein Recht,
Dat Mäten noch en Blam tau maken.

JEHANN
Ih, swig doch still von sonne Saken.
Heww’n up den Harwst wi noch kein Dack,
Denn treck wi furt mit Sack un Pack,
Denn treck w’ de Kramersdörper nah,
Denn gahn wi nah Amerika.