„Plattdeutsche Klassiker lesen!“

Fritz Reuter: Kein Hüsung

gekürzte Hörspiel-Fassung:


Inhaltsverzeichnis

Orthographie Reuter (2.Aufl. 1854) | Orthographie Herrmann-Winter 〉〉 |
Reuter mit Übers. | Herrmann-Winter mit übersetzung

-       68       -


Dor ward verswinnen,
Wat lang gescheihn;
De Näbel wieken
Vör Morgenwind,
Vör sien Mariken
Un vör sien Kind.
Ein nieges Leiwen, ein nieges Läwen!
Dor ward uns denn ok Hüsung gäwen.“

ERZÄHLER
Un as s’ noch in Gedanken sitt
un liesing singt de Melodei,
dunn kümmt herup ein sweren Tritt,
ein trampst sik buten af denn Snei
un grawwelt an de Klink herümmer;
Inspekter Brümmer kümmt herin.

INSPEKTOR
„Gu’n Åbend, Diern!“

MARIK
„Gu’n Åbend, Brümmer!“

ERZÄHLER
Un fohrt tau Hööcht: wat süll dat sien? –
Wat süll hei will’n? Ehr Hart dat sleiht:
Wenn ’t man nicks Slimmes wäsen deit.

INSPEKTOR
„Marik, weit Gott, ik dau ’t nich giern. –
nimm Di dat nich tau Harten, Diern!“