„Plattdeutsche Klassiker lesen!“
Fritz Reuter: Kein Hüsung
gekürzte Hörspiel-Fassung:
Orthographie Reuter (2.Aufl. 1854) | Orthographie Herrmann-Winter 〉〉 |
Reuter mit Übers. | Herrmann-Winter mit übersetzung
- 64 -
MÖLLERFRU
„Ik finn so väl woll noch tausåmen. –
Herr Je, wo di de Backen brennen!
Ik bün ’ne Fru, ik möt dat kennen,
süh, du geföllst mi gor nich recht,
harst di man in dat Bett ’rin lecht,
dor wier ’t tauminst ’n bäten warm.“
ERZÄHLER
Un nimmt Marik dat Kind von’n Arm
un lecht dat in de Weich.
MÖLLERFRU
„Süh söking!
Wo licht hei nüdlich dor, Herr Jeking!
Un wo hei kiekt! – Je, kiek du man!
Un wo de Hand all grippt, ach Götting!
Nee, kiek doch blot mål an dat Lütting!
Hei fött sik an de Weich all an.“
MARIK
„Sei heww’n mi so väl Gaudes dån …!“
MÖLLERFRU
„Ih, räd doch dorvon nich mihr, Diern!
Ik heff s’ di bröcht un ded dat giern.
Un dat ’s ne Weich, du kannst mi glöwen,
so’n deit in ’t ganze Dörp nich gäwen.
Ik heff s’ noch von mien Öllern kreegen.
Jå, Diern, dor heff ik sülfst in leegen.
Un denn bi mi nåhst all mien Nägen.
Nee, kiek, Marik, hei måkt all Öging!“