MARIK
Ach, wenn wi nu kein Hüsung kriegen!
Jehann, kein Hüsung – keine Tru!
Uns gifft kein Preister nich tausåmen,
wenn Ein uns nich in Hüsung nåhmen.

JEHANN
Ih, wenn wi narens unnerkåmen,
denn treck wi in de Stadt herin.

MARIK
Dat sall man ok nich mœglich sien.

JEHANN
Wat? Jochen is doch ’rinner treckt.

MARIK
Jehann, von Jochen will’n wi swiegen.
Mit denn wür dunn de Schann’ taudeckt,
em wür taugliek dat uperlecht,
denn Råtsherrn sien oll Diern tau friegen.
Ach Gott, ik räd! – Ik heff kein Recht,
dat Mäten noch ein Blåm tau måken.

JEHANN
Ach, swiech doch still von so ’ne Såken.
Heww’n up denn Harfst wi noch kein Dack,
denn treck’ wi fuurt mit Sack un Pack,
denn treck’ w’ de Kråmersdörper nå,
denn gåhn wi nå Amerika.“