„Plattdeutsche Klassiker lesen!“
Fritz Reuter: Kein Hüsung
gekürzte Hörspiel-Fassung:
Orthographie Reuter (2.Aufl. 1854) | Orthographie Herrmann-Winter 〉〉 |
Reuter mit Übers. | Herrmann-Winter mit übersetzung
- 21 -
Ob ein de Knåken kann noch rögen,
wer fröcht dornå? – Genauch – wi sœlen. Un wenn s’ denn blot uns Hart mål frögen
un ’rinner seegen in uns Not
un günnten uns uns bäten Brot
un günnten uns man blot de Städ
un as ein Minsch taum Minschen stünn’n,
denn wull’n w’ ehr Macht un Riekdaum günn’n,
denn wür kein Arbeit uns tau swer.
Weck sallen ’t daun un sall’n de Lüd
as Minschen hollen; åwer hier!
Hier hett kein mihr ein heilen Rock,
hier is dat däächlich Brot de Stock,
un Schandwür’ sünd hier noch dat Best.
So is uns Herr, so is sien Vadder wäst.
Dat is ’ne wohre Schinnerbann’!“
ERZÄHLER
As witte Duf un swarte Råf,
so stimmt tausåmen Herr un Slåf.
Ehr Vördeil geiht woll Hand in Hand,
sei wåhnen beid in einen Land,
sei åten beid de sülwig Luft,
un rauhn villicht in eine Gruft.
An einen Gott, dor wenn’n sei sik –
doch Hart un Hart, dat finnt sik nich.