„Plattdeutsche Klassiker lesen!“
Fritz Reuter: Kein Hüsung
gekürzte Hörspiel-Fassung:
Orthographie Reuter (2.Aufl. 1854) | Orthographie Herrmann-Winter 〉〉 |
Reuter mit Übers. | Herrmann-Winter mit übersetzung
- 12 -
Besinn Di doch un räd nich so!“
JEHANN
„Nicks kann hei, wenn ’k mien Arbeit dau!
Un måkt hei mi Verdreitlichkeiten,
denn smiet ik em denn Kråm tau Fäuten
un kann mi annerswo vermeiden.“
MARIK
„Dat kannst Du daun, dat kannst Du. – Jå.
Kannst sülfst hen nå Amerika.
Un süll dorüm mien Hart verbläuden,
Di steiht denn frie de ganze Welt.
Ik un mien Kind, wi sitten hier,
Du schickst denn af un an mål Geld,
bet ’t Di tauletzt denn mål inföllt,
dat ’t nu någrådens nauch woll wier.
Doch glücklich wardst Du nümmermihr.
Du slöppst so ruhig nich as sünst,
wenn Di mål dröömt, dat ik un ’t Kind
hier unner einen Herrn sünd,
bi denn Du ’t nich uthollen künnst.“
ERZÄHLER
Dat packt em an, dat sleiht denn Kierl
as Dunner ’runner von denn Dwierl
bet in de Tehn’n. Hei höllt sei fåt’t,
un ballt de Fuust, stampt mit denn Faut:
JEHANN
„Denn gåht mi ’t all mien Dåch nich gaut,
Mariken, wenn ik Di verlåt!