„Plattdeutsche Klassiker lesen!“
Fritz Reuter: Kein Hüsung
gekürzte Hörspiel-Fassung:
Orthographie Reuter (2.Aufl. 1854) | Orthographie Herrmann-Winter 〉〉 |
Reuter mit Übers. | Herrmann-Winter mit übersetzung
- 14 -
dat, wenn de Häwen einmål lacht,
denn keem nie wedder düüst’re Nacht,
kein Wäder trööch heruppe swart.
So süng ’t in ’t Hart de arme Diern,
un ’t arme Kind, dat glööft so giern! – –
MARIK
„Nu kumm, Jehann, wi möten gåhn.“
JEHANN
„Oh, nee, Mariken, sett Di dål,
kumm, sett Di in dat Gras tau mi,
as Du dat sünst so giern hest dån.“
MARIK
„Jehann, låt sien! Låt sien, Jehann.
De ollen Tieden sünd vörbi;
Gott weit, ob sei mål wedder kåmen.
Ik möt nå Hus, nå mienen Ollen.“
ERZÄHLER
Hei rapt sien Haut un Stock tausåmen
un kricht sei an de Hand tau hollen:
MARIK
„Nee, nee, Jehann, nu nich! Nu gåh!
Kumm leiwerst up denn Åbend nå.“
ERZÄHLER
Dor gåhn sei hen;
un denn un wenn,
denn ståhn sei still un kieken sik
einanner nå un winken sik.