Ik freet di vör Leev op!
Wat hest du för Puusbacken,
Noch söter as Tweebacken!
Ei, du lüttje Flasskopp,
Ik freet di noch op!
Ei, du lüttje Wiessnuut,
Wo böst du dien Hans ut!
De Tung geiht as en Lammersteert,
Dien Hans is keen Dreeling weert.
Ei, du lüttje Wiessnuut,
Wo schellst du mi ut!
Ei, du lüttje Witt-Tähn,
Wat mag ’k di geern dull sehn!
Wo se plötert as en Kaffeemöhl,
Wo se klötert as en Mösersteel!
Ei, du lüttje Witt-Tähn,
Wat mag ’k di geern sehn!
Ei, du lüttje Keuthohn,
Wat kiekst du mi kasproot an!
Kumm, wullt mi to Kopp flegen?
Ik heff noch keen Dütt kregen!
Ei, du lüttje Keuthohn,
Wat kiekst du mi an!
Ei, mien lüttje Annamedder,
Kannst mi afwischen as ’n Breeteller,
Kannst mi utwringen as ’n Footdook,
In ’e Eck stellen as ’n Handstock.
Ei, mien lüttje Annamedder,
Ik bün slantig as en Dook!