Kannst sülwst hen nah Amerika,
Un süll dorüm min Hart verbläuden,
Di steiht denn fri de ganze Welt;
Ick un min Kind, wi sitten hir,
Du schickst uns af un an mal Geld,
Bet ’t Di tauletzt denn mal inföllt,
Dat ’t nu nahgradens naug woll wir.
Doch glücklich wardst Du nümmermihr,
Du slöppst so ruhig nich as sünst,
Wenn Di mal drömt, dat ick un ’t Kind
Hir unner einen Herrn sünd,
Bi den Du ’t nich uthollen künnst.

ERZÄHLER
Dat packt em an, dat sleiht den Kirl
As Dunner ’runner von den Dwirl
Bet in de Tehn. Hei höllt sei fat’t,
Un ballt de Fust, stampt mit den Faut:

JEHANN
Denn gah ’t mi all min Dag’ nich gaud,
Mariken, wenn ick Di verlat!
Wenn ick mi von Di scheiden künn,
Denn süll kein Man un keine Sünn,
Kein Stirn mi schinen all min Dag’;
Wenn ’ck Di mi ut den Sinn eins slag,
Will ’ck elend dörch de Welt hen rönnen,
Un in de Höll will ’ck ewig brennen.
Ick lat Di nich, ick lat Di nich!
Hei mag mi martern fürchterlich,
Hei mag mi schin’n, hei mag mi pedd’n,
Ick holl hir ut bi unsen Herrn.