Schreibung:
Original



John Brinckman


Ni Quartir


Nu treck wi, nu treck wi
De Voerstadt lustig lank!
Nu kümmt de hele Cumpani
Mit Sang un Kling un Klang, juchhei!
Mit Sang un Kling un Klang.

De Herr Furir, de Herr Furir
De tröck üns lang voerut.
Hurra, hurra, ’n ni Quartir!
Hurra, ’ne nige Brut, juchhei!
Hurra, ’ne nige Brut!

Un wenn wi werre voerwarts gan,
Is mennigen beswoegt;
Man Jumferntran, sonn Jumferntran,
Wu ball is de nicht droegt, juchhei!
Wu ball is de nich droegt.

Kumm her ens, Lisch! Kumm her, Marik,
Wisch, Stin un Fik un Dürt!
Wu is de beste Danzmusik,
Wu sünd de besten Uert, juchhei!
Wu sünd de besten Uert?

- Nu kumm, Kamrad, un mak di prat!
Nu soek’ wi beid üns en.
Wat dücht di vun de Swart, Kamrad?
De is mal stramm to Ben, juchhei!
De is mal stramm to Ben.

Flink, ir en anner fast se loßt!
Wat dücht di vun de Witt?
De smitt sick mächtig in de Bost
Un hett sonn stolzen Tritt, juchhei!
Un hett sonn stolzen Tritt! -

- - Nimm du de Witt, nimm du de Swart,
Nimm du se di allbeir!
Ick let to Hus min Hart, min Hart,
Ick let to Hus min Freur, juchhei!
Min Schatz, min Trost, min Freur.

Ick will ken Hand, de sachte strakt,
Ick mag ken blanke Og!
Min Wurt, dat hew ick er vermakt,
An en doa hew ick nog, juchhei!
An en doa hew ick nog! - -